الى متى ..؟ وويلات مسلسل نور تلاحقنا

مسلسل نور ليس ككل المسلسلات ..هو مسلسل أدمنه الصغير قبل الكبير .. و الزوجات قبل الأزواج ..و المراهقين والمراهقات ..حتى الخدم>> تركوا شغلهم وقعدوا للمسلسل.. اعزائي ما دعاني الى كتابة الموضوع حتى هذه السطور هو موقف حصل أمامي وعلى نفس الطاولة اللي قاعدين عليها ونحن في عرس ناس من أهلنا ..وهذا الموقف ( براعم في عمر الزهور..صغار)


سارة: تعالي يا روية شفت أمس المسلسل ..عرفت شو صار نور ذبحت عابدين..

روية: يــــــاه ..! (واهي متفاجأة) والله هذا اللي صار يالله خبريني شو صار أنا كنت في الملاهي ويا أهلي امس وتأخرنا....الخ

سارة : تصدقي اللي صار نور الحرمة ذبحت عابدين ومهند الريال ما قدر يسوي شي ..مالت عليه هذا ما يستاهل يكون حبيبها ..المفروض اهو اللي يقتل عابدين.

(تقاطعهم "مزنة" ): لا وبعد ما شفتوا شي بيستوي شي فظيع ..!

روية : وانتي شو عرفج؟!

مزنه : أنا تابعته المسلسل من قبل لي النهاية وهالحين بيحبسون نور في السجن..مسكينه

سارة: يحليلها والله ما تستاهل نور ؟
رويه : المهم كملي وعقبها شو صار؟

سارة اهئ.. مهند بيقعد يصيح على حبيبته وسار حقها وشال لها ورد..لا ومارضى يروح من عندها والزيارة وقتها انتهت ..يحليله وايد يحبها ..

رويه: أنا يوم بكبر بتزوج واحد يشبه مهند ..!

مزنه : اونه.. وين بتروحين تركيا ؟

روية : عادي احنا هالصيف قررنا أنا وخواتي وأمي نسير تركيا ..وتصدقين وناسة ..حتى خواتي كلهم مستانسات .

سارة : ياحظكم..انا بعد بروح أخبر أختي حتى تقنع أمي وأبوي نسافر عاد هذه تموت في مهند .

## قاطعتهم: حبايبي تعالوا شوي ..قربوا ..انتوا اش لكم في هالمسلسل ..هذا مسلسل ما يناسب عمركم!

سارة: عاادي كلنا في البيت نموت على هالمسلسل

روية: وحتى أنا واخواتي واخواني الأولاد قاعدين يم التلفزيون ما نتحرك لو شو ما صار

## قاطعتهم : وين اهلكم عنكم ليش مخلينكم تسهرون على هالمسلسل؟

ترد مزنه : شو فيها يعني نحن نسهر للفجر وأمي مب دارية عنا يا معزومة يا فعرس..

سارة: تعرفين مهند عقب ما يروح من عند نور شو عطاها (............) .


مزنه: أأأه

روية: عيب ما يصير هالكلام تقولينه جدام خالوا ؟

## قاطعتهم : حبيبتي أنا بكلم أهلج كيف سمحون لج تشوفين شرات هالمسلسلات انتوا صغار..!وهذا مايصير ..وكيف اخوانكم يسكتون..؟

مزنه: نحن صرنا نعرف كل شيء وعادي محد مهتم..وأنا تابعته للنهاية..وجدام خواتي الكبار وخالاتي محد قالي انه مايصير..


(باستغراب وحييرة ومشاعر غضب ) ## قاطعتهم مرة أخرى: هذا اللي يصير عندنا مو معقولة ؟!


خواتي اخواني مو حابة أطول شو رايكم قضية أو مسلسل للنقاش..القضية صارت كبيرة دخلوا فيها براعم صغار ..المفروض نعلمهم القيم والعادات السليمة والأسس الصح ..مش مسلسلات في قمة الانحطاط وفيها مشاهد جنس وقبلات واغتصاب وقتل وجريمة ..شيء فظيع اللي يصير ..شو الحل في نظركم ؟..ووين الأهل عن أولادهم..؟

والله لونا قشتهم في قضية عن فلسطين عن العراق عن سيرة الرسول ما يعرفون شي ..والمسلسل هذا وغيره حافظينه صم..الله يحفظ عيالنا من هالفضائيات وما تعرضه من رذيلة..حتى في الاعلانات..حطوا نشيدة موقف حلو ..لا حاطين مهند ونور ..العالم كأن صار كل اللي بشغلهم هاليوم اهي نور وهالمهند.. اسمحولي عالأطالة ..وانتظر ردوودكم وحلولكم..





ملطوش